Artikel uit Lééf tydskrif 2024 (Herfs uitgawe) Skrywer: Riëtte van der Wat
Vroue is “honger vir hoop”, sê Madeleine Rootman, die stigter van Gesalfde, ‘n reeks natuurlike, tuisgemaakte pamperlangprodukte vir die lyf én siel.
“Baie vroue is in ʼn groef. Jy oorleef net terwyl iets die passie in jou onderdruk. Die vyand het mos al lank gelede gekom om die vrou swak te maak. Hy doen dit deur ons selfbeeld te vat. Maar daar is soveel krag in vroue, ‘n krag wat die wêreld kan verander as dit ontsluit word.”
Madeleine (39), wat in Durbanville woon, bedryf haar onderneming sedert 2017 vrou-alleen. “Iemand na aan my het deur ʼn finansiële krisis gegaan en ek het die Here gevra hoe ek kan help,” onthou Madeleine, wat in daardie stadium skakelwerk gedoen het vir die nie-winsgewende organisasie The World Needs a Father.
“Dit is hoe die naam ‘Gesalfde’ op ʼn doodgewone werkdag by my opgekom het. Ek het met R150 laventel- en peperment-olies by ‘n apteek gaan koop en rondgespeel met badolies en lyfskrop.”
Sy vertel laggend dat sy die eerste drie jaar niks geweet het nie – nie van essensiële olies óf ontwerp nie.
“Ek het die etikette sommer op Word gemaak en was glad nie verbaas toe niemand eers die produkte kom ruik het by die eerste vroue-oggend waar ek uitgestal het nie. Daardie eerste drie jaar, het ek feitlik niks verkoop nie, maar al het dit nie sin gemaak nie, was daar iets in my wat nie wou ophou nie.”
In 2020 het sy deur ʼn diep, donker vallei gegaan. “Ek het geworstel met myself en die Here: Sal ek ooit genoeg wees? Sal ek geliefd wees? Sal ek ooit gekies word?
Vandag kan ek getuig dat die Here ons trane opvang en alles nuut maak. Hy vat die seer en verander dit in vreugde.”
En daarom stuur Madeleine haar produkte die wêreld in met ʼn boodskap wat vroue nie net aan hul eiewaarde herinner nie, maar ook aan hoe lief God hulle het. Die produkte, waaronder ʼn reeks lyfolies met geure soos roosmalva, lemoen en vanielje, het name soos ‘Vreesloos’, ‘Vegter’, ‘Getrou’, ‘Genoeg’ en ‘Gekies’; elk met ʼn Bybelse bemoediging.
“God se Woord bring genesing en hoop. My wens is dat die regte blikkie olie met die regte boodskap, op die regte tyd by die régte vrou uitkom.”
Madeleine is ʼn kreatiewe mens met ʼn wavrag idees.”As ek eers iets by die werk reggekry het, raak ek vinnig gefrustreerd en voel dan ek moet myself weer met iets nuuts uitdaag. Maar Gesalfde bly my hart en my passie – dis iets wat ek nog vir ʼn lang tyd wil doen.”
“Ek het geleer jy moet net aanhou, al klop die somme nie vir jou nie. ʼn Mens moenie die dae van klein dingetjies gering ag nie. Nou weet ek die Here se idee met Gesalfde was dat dit méér moes wees as net lyfolies en badprodukte. Die idee was van die begin af om ander te help.”
Einde verlede jaar het Madeleine uit haar werk bedank en voltyds met Gesalfde begin woeker. “Dit was een van my grootste geloofsspronge tot nog toe, maar die oomblik toe ek die besluit geneem het om my eie ding te doen, het die spanning weggeval en dinge het net reg uitgewerk.”
Boonop word Madeleine deesdae dikwels genooi om haar verhaal te deel.
“Ek is ʼn introvert en om voor 120 mense te praat is nie my ding nie. Maar toe die tweede en die derde uitnodiging kom, het ek geweet die Here is besig met iets.
Dit laat ʼn mens weerloos voel om jou eie storie te deel, maar Hy weet as daar selfs net één vrou is wat dit moet hoor.”
Daar was al talle getuienisse van mense vir wie ʼn Gesalfde-produk iets beteken het, soos die vrou met kanker; ʼn ander een wat besluit het sy gaan nie meer toelaat dat ander haar minderwaardig laat voel nie en selfs iemand wat selfmoord oorweeg het.
Die nuutste lyfolie in die Gesalfde-reeks is ‘Volhard’ en dit lê Madeleine na aan die hart.
“Ek het só baie geleer, veral om nie op te gee nie. Die lewe kan ʼn mens soms moedeloos maak en jou laat wonder of dit dan nou al is waarvoor jy gemaak is. Persoonlike dinge gebeur wat jou laat twyfel oor of jy genoeg is.
“Gesalfde het my gewys daar is soveel meer in ons as wat ons dink – ons moet net bereid wees om te waag en te spring.” Die Gesalfde-produkte maak haar eie lewe betekenisvol en sy hoop dit doen dieselfde vir ander: “My wens is dat die olies nie net lekker moet ruik nie, maar dat die produkte God se Woord ook soos ʼn aangename geur sal versprei.”
